除夕，無訂位，搵食難，將就將就，去到觀塘APM，揀左呢間，預左唔會特別好味，但求不難食，唔好斬人一頸血，就算係咁啦！
散叫實貴，唯有叫套餐，二人套餐無乜得揀。
前菜係螺肉或八爪魚仔，我地揀左螺肉，超市貨色！
軟殼蟹沙律，普通唔特別，有得食算係咁，好似好大碗，其實菜同菜之間的空隙都唔少，最搞野係侍應行過收隔離桌的碗筷時，竟撞跌我地食到一半的沙律裡面，最大片紫色的菜葉！呢塊葉的營養係高過其他葉架！侍應用佢自己先聽到的聲音道歉，然後扮側側膊問我地仲要唔要呢盆食淨得番幾塊葉的沙律，唉！唔要啦！最好果塊葉都俾你撞跌，仲要果淨番果幾塊葉，容乜易都俾你撞跌埋！
炸芝士年糕，一人一舊仔！
叉燒湯拉麵，細碗到兩啖食晒，叉燒多到只得一塊！
剌身三種，每人一件！
二人份的牛肉片和豚肉片，底係椰菜絲，用蒸的方法，一上桌先食一塊牛肉，跟住食第二塊已經開始老，再食落去．．．食淨一半！每人一枝汽水，可樂雪碧等任揀，唔係日本的波子汽水，甜品都無呀！
盛惠$238再加一！
加一服務費！！！毫無服務可言的食肆，未坐低就話限時一個半鐘，坐低無人理，無人take order，要嗌，埋單仲神奇，嗌完都無人理！
$261.8？
好！2 x $100、1 x $50、1 x $10 、1 x $1、1 x$0.5、1x$0.2、1 x 0.1
想要貼士，發夢啦！
