釜山行第一天
大韓、港龍、釜山航空往釜山的航班，都集中在凌晨兩點左右，很累人！
上機派入境表派面包盒，跟住熄燈，話咁快天光，因為韓國快香港一個鐘，明明望到機場大樓，但要坐巴士由中間駁入去。
入境大堂塞滿差不多同時到的香港航班，個個櫃檯排長龍，逐個影相打指模，最戅居係中間四個櫃檯外國人入境，右邊有條韓國人e道，結果要用e道的人要穿過排隊人龍。
出去即刻排隊租wifi 蛋，olleh條龍最長，差不多全部香港人，明明㩒飛嗌號碼，但人龍已成，冇人攞飛，隔離sk同LG冇咁多客，但個個㩒飛，冇排條人龍阻路。
期間有韓國人在我後面的人後面穿過，撞到我後面的人，佢「即」個韓國人，個韓國人返轉頭推佢2下，話我地排隊阻住佢地行。
後來有個常到首爾旅遊的舊同事來到釜山共聚晚餐時，告訴我原來olleh可以網上預約，LG唔可以，佢都有預約左olleh，不過到埗見排隊，就改用LG，我地去的地方同日數，用邊個網絡都一樣價錢一樣好用。早知我就唔排olleh，排左成粒鐘！
排左成個鐘，搞掂就去坐軽鐵和地鐵到住宿寄放行李。
未到check in時間，累得很也無奈要四圍狂，所以到附近吃早餐。
Angel in-us coffee響西面站有好多分店，好似便利店，24小時服務。
食完就坐地鉄去大淵站，諗住雙胞胎豬肉湯飯店要排隊，點知好快就有位。
點左豬肉湯飯和豬什湯飯，忘了應點煮豬肉湯飯，只好再有時間先再幫襯。
食完仲未可以攞房，於是坐兩個站地鐵去南川洞睇住宅區櫻花。
唔係最燦爛，開始落花添。一幢幢靠海邊的住宅，仿似公屋，毗鄰一幢幢新樓似高尚住宅，但公屋位置略勝，有海景有單車緩跑徑，仲望住廣安橋和海雲台。
下午三時直睡到晚上九時，起身到樂天百貨後面的大排檔食晚飯兼宵夜。
手指指咁點了海菠蘿、螄蚶、雞腎、鯖魚、辛字麵和燒酌。
