外表不怎麼樣，但名氣響，又係APEC班領袖食過，侍應著晒韓服，招呼同傳菜唔同人，唔准搭枱，盛器多用銅器，連枱面2個醬油壼都寧捨靚，就知道「唔平」。
正如其他幫襯過的blog友所言一樣，2人點個細蔥餅，侍應會立即糾正你，話呢個係一人份量，2個人要食中size。唔係好明點解唔俾人留肚食其他嘢。
由於blog友預告，所以我地點左一個細東萊蔥餅和一個細磨菇蔥餅，侍應先至滿意，而我地多點一個海螺蔬菜，侍應非常滿意。
蔥餅都幾漏，飽肚，邊邊係脆，中間軟棉棉，而東萊蔥餅有少許海鮮如蠔仔蝦仔，磨菇蔥餅就有少許不同菇、適合素食者。
食完之後有糖水，係南瓜甜湯，不膩，實在可解去蔥餅的膩感。
跟住響東萊站附近超市行左一陣，個超市乜都有，波鞋衣履都有，空間面積大，樓底又高。
俾完錢之後如果太多嘢，可以自己裝箱。
逛完就坐地鐡去江西區㕔站，點知我地其中一張一日票出唔到閘，搵職員協助，佢用部機碌一碌就出到，然後同我講話張飛已broken，叫我地跟佢去辦公室，去到辦公室，佢同個高級D的人講左一陣，個高級職員響櫃桶攞左D錢，又叫我地跟佢去售票機。
無錯！你估中了！佢攞錢買過一張一日票俾我地，仲煞有介事響張票度簽個名。
唔知簽黎做乜，因由始至終都只得我地同垃圾桶會接觸呢張飛。不過，佢呢個解決方法幾好，好快搞掂。
江西區廳冇乜特別景點，但呢個時候，果度有一大片油菜花海，呢三日仲有嘉年華響度舉行。
好靚！
因為有嘉年華的關係，有濁酒試飲添，真係唔錯。
行完油菜花海之後，又去札嘠其翻兜海物天地，今次加多2隻鮑魚，烏冬要雙份。
上次冇加鮑魚，烏冬單份都食唔晒，今次竟然食得晒。
食完就返東横瞓覺，聽日早機，點知張房咭開唔到門，搵前台，佢問我係咪聽日Check out，然後響電腦度㩒2㩒就搞掂，應該係之前果位入錯日期。
