食完早餐再瞓過，十二點先起身，去札嘎其食海鮮。
最高最大有雙手捧住個地球係門口嘅大廈，就係遊客同旅行團多數幫襯的地方，𥚃面店舖幾乎都設定好套餐方便遊客。
出面攤販其實都唔錯，有D可以坐低飲啤酒食燒烤海鮮。
附近都有街舖，好似西貢，門口有海鮮缸。本來對其中一間有興趣，但一碟雜蜆要三萬韓元，一碟鮑魚亦係三萬韓元，松葉蟹1kg六萬韓元。問題係碟雜蜆唔值呢個價錢，所以最後冇幫襯，阿珠媽仲話呢度間間價錢一樣。
哦。知道了。
其實仲有兩幢矮D，外貌冇咁靚嘅海鮮市場，一樣有得食。結果揀左中間人多D果檔。
呢度嘅嘢價錢合理D，仲有一枱都係香港來的，同聲同氣梗係好D，我地交換食海鮮情報，佢同事話佢知出面檔販食燒烤海鮮仲平D。佢仲介紹我地食燒海鰻，下圖右面下面果碟就係，唔平架，又細條，但連頭連尾香脆嫩滑，真係超級正！唔該晒！呢個推介真係好！
食完就向光復路、BIFF廣場去，經過龍頭山公園。
釜山塔響公園上面，登釜山塔要付費，我冇幫襯。好悠咁影下相坐下，見到欒天百貨。
落番去街有小食檔，其中一檔好出名又要排隊的炸餅，湊熱鬧都幫襯左一個。
12樓有小朋友設施，可以坐小火車，仲有個小型動物園俾佢地睇下小動物，有兔仔、鸚鵡等，最不人道係竟然有隻狗。
困響個籠度，佢都唔多理人，天黑後我再上黎諗住影夜景，聽到佢係度吠，但冇人理。
天未黑時，12樓上13樓有左右兩邊，可坐電梯或者行樓梯，一邊有個假的釜山塔同埋又係Angel in us coffee，呢間野幾乎響樂天百貨有幾間，地庫超市Food Court層有、10樓食肆層有、音樂噴泉層都有。
入去sky park店坐下。呢個Berries ice flakes真係好好味。
13樓另一邊冇咖啡店冇假釜山塔，但接近D真的釜山塔，睇到車水馬龍的車道同BIFF廣場。
仲影到日落同釜山塔。
落去行一陣再上黎影夜景，碰巧音樂噴泉在表演，這個入了健力士世界紀錄大全的噴泉，配合不同音樂表演。
睇完就上番去影夜景，點知近釜山塔果邊封左唔俾上！
唯有去另一邊。對住個假塔遠眺釜山塔，無可避免影到天台插住果支韓國旗。
影完落去食南蒲人蔘雞，佢對面幢大廈火燭完圍左板，擋左間舖，差D搵唔到。
點左一份人蔘雞和一份烤雞，有人蔘酒送。隔離枱位伯伯主動幫我地影相，仲話我地知人蔘酒係送嘅，咖啡可以任飲。結果我就同佢傾左半個鐘，佢係日本人，明日返京都，但佢都有韓國血，所以佢響呢間好熟。
講左一大輪，散水！
返東橫瞓覺。
