通貨膨脹，貴而差，無奈！
橙，新奇士橙最出名，但好耐好耐已經發現，點解新奇士橙容易係買到酸的？點解橙皮咁厚，厚過我塊面皮？點解水份咁少？個橙好輕？之但係身價好高喎！
有一次，我見一個菲傭響生果檔，二話不說去揀澳洲橙，心諗佢地成日黎街市買菜，要精打細算，買平橙又要甜及多水橙，否則會被主人懷疑佢地落格或鬧佢地唔識買橙，所以決定冒險試下跟佢買，結果發現，菲傭原來都好醒架！D澳洲橙唔錯，甜多過酸，有些會皮厚，但斷唔會乾水都好似新奇士咁輕，同樣Size但就平過新奇士，咁我就以後都買澳洲橙，早排就見過非洲橙，但都唔及澳洲橙好食，之但係最近生果檔充斥都係新奇士，澳洲橙愈來愈少，響個角落頭，睇怕遲D會無晒，因為澳洲早排內陸海嘯，乜都無晒！
呢隻芥蘭苗超好食，閒日賣$14／斤，假期會加兩蚊，每個街市唔同價，但真係好好食。突然間我記起睇過一段紀錄片，係內地農民訪問。農民話其實呢D芥蘭同菜芯，所謂苗都係平時食開果D，只係佢地將頭尾及大塊外圍菜葉批走，留番中間最嫩的才賣，結果係賣出的價錢較成棵多，令佢地收入增加，而呢d苗又受歡迎，佢地好開心。究竟，我地咁嘴刁，是對還是錯？是間接暴殄天物？還是協助了農民？
