漿糊火窩

任食火窩，每位$123，水準如何？心裡有數。

旺角創興廣場八樓花園金閣，湯底要了海底椰拼沙嗲，加清水後鴛鴦會合二為一，因為侍應會儘量多加水，免成日要斟水，水多滾起，自然會滾過界！哈哈！算啦！無所謂，一分錢一分貨。牛骨髓係凍肉舖的急凍貨、粉腸中間竟然無粉，以為係穿窿橡筋（笑晒！）梗係無人食啦！

奉勸所有吃火窩人士，千祈千祈咪一開始就落有沾粉的食物，例如魚皮餃雲吞之類，咁樣會等於落生粉水，湯變糊，然後黐底！
任食火窩仲可以任飲竹庶矛根水，一大壼壼咁沖俾你，壼底有紅蘿蔔同甘蔗，但一飲就知道，咁濃的顏色，全靠竹庶矛根粉開水架！甜過食糖！我們問侍應有沒有茶，侍應答得妙：「茶樓梗係有茶啦！無茶點叫茶樓呀！」好！咁就俾壼普洱我啦！

呢壼普洱，係最好飲架！因為d竹庶矛根水，飲到我想嘔！